老公遇上肯借影印機嘅老細

老公做IT，公司砌電腦到換光管一腳踢。做耐咗發現公司嘅printer其實無乜點用，而我經常要搵舖頭影印。老公膽粗粗問老細可唔可以計返錢借少少quota出去，老細ok咁就皆大歡喜。事關一到開學時候，影印舖就排晒長龍，高峰期試過要放低三四日先至印好。

難得老公間公司肯分享資源，我好似多咗部私人影印機咁，兩個女溫習筆記固然唔成問題，唔單止方便，而且影印質素一定靚過出面街。不過現在好多時都真係唔駛用太多紙，影印機都唔一定要影一堆hard copy嘅，我自己進修上堂抄嘅筆記足足有四本單行簿，帶返公司又異相又唔方便，索性將佢影印變成pdf，放入電話，食飯搭車溫習下，無計，為咗兩個女，終身學習希望可以事業更上層樓啦。

後來慢慢幫阿女嘅同學仔影印，有時份量都幾多，好彩部影印機都算快，唔駛太耐已經搞掂。最痛苦反而係阿女跟同學仔一齊搞同人誌漫畫，印完又要落騎馬釘又要裁紙，用嘅紙又多，我好驚老公嘅公司會唔鍾意。好彩現時嘅影印機都好先進，計清楚邊個印幾多張，仲有幾多碳粉之類，老公都會同公司交待清楚，用幾多耗材，都會公道計返數幫手補充返，唔會阻到其他同事開工，條數亦都好化算。如果偷偷摸摸，無錯可以唔俾錢一兩次，但係時間耐咗總會被發現，不如清清楚楚好過啦。